🎯ब्रेकिंग ; मराठी माणसे भिकारी यांना मारा ; कल्याणात हायप्रोफाईल सोसायटीत परप्रांतीयाकडून गंभीर मारहाण.

संतोष पडवळ – प्रतिनिधी

ठाणे, कल्याण ता १९ डिसें : कल्याण शहरात धूप लावण्याच्या वादातून तुफान राडा झाला आहे. या वादात एका मराठी माणसाला बेदम मारहाण करण्यात आली. अखिलेश शुक्ला याने 10 ते 15 जणाच्या टोळीला बोलावून सोसायटीतील तीन जणांना बेदम मारहाण केली. या मारहाणीत अभिजीत देशमुख गंभीर जखमी असून, त्याला उपचारासाठी रुग्णालयात दाखल करण्यात आलं आहे. या घटनेचा व्हिडीओ सोशल मीडियावर व्हायरल झाला आहे. पोलिसांनी याप्रकरणी दोन्ही बाजूंच्या तक्रारीच्या आधारे गुन्हा दाखल केला आहे.

कल्याण पश्चिमेतील योगीधाम परिसरात अजमेरा हाईटस ही इमारत आहे. या हाय प्रोफाईल इमारतीत अखिलेश शुक्ला हा अधिकारी राहतो. त्याच्या शेजारी अभिजीत देशमुख आणि विजय कल्वीकट्टे राहतात. बुधवारी रात्री अखिलेश शुक्ला याने घराबाहेर धूप लावला होता. धूपाच्या धुराचा शेजाऱ्यांना त्रास होत होता. याबाबत शेजारी विजय कल्वीकट्टे याने शुक्ला याला टोकले. त्यावरुन त्यांच्यात वाद झाला.

या वादातून अखिलेश शुक्ला याने बाहेरून 10 ते 15 जणाना बोलावलं व सोसायटीतील लोकांना लोखंडी रॉडने माराहाण केली. यात विजय कल्वीकट्टे, अभिजीत देशमुख, धीरज देशमुख हे जखमी झाले आहेत. विजय यांवर मुंबई येथील सरकारी हॉस्पिटलमध्ये उपचार सूरू असुन त्यांची प्रकृती गंभीर आहे.

विजय कल्वीकट्टे याने प्रसारमाध्यमांशी संवाद साधताना सांगितलं की, “मी रात्री घरी आल्यावर फ्रेश होऊन बसलो होतो. त्याने घरातून आपल्या मित्रांना समोरचं घऱ दाखवलं. यानंतर त्यांनी घराबाहेर उभी सायकल जोरात आपटली. समोरचा माणूस बाहेर आला असता त्यांनी त्याला रॉडने मारहाण सुरु केली. मी काय झालं पाहायला बाहेर आलो तर ते मारहाण करत होते. मी मधे पडलो असता मलाही मारहाण करण्यात आली. महिलांनाही मारहाण केली. ही मराठी माणसं भिकारी आहेत, यांना मारा असं म्हणत शिव्याही दिल्या. त्याला 10 ते 12 टाके पडले आहेत. खाली भेटा, तुम्हाला मारुन टाकतो अशी धमकीही त्याने दिली आहे”.

About The Author

संपादक - संतोष पडवळ, कायदेशीर सल्लागार - अँड.रविराज बोटले,B COM,LLB (मुंबई उच्च न्यायालय)

See author's posts